普巴馬迪最佳拍擋　雙紅會前發表奪冠宣言

《英超刨績王》加強版，最強數據一網打盡：http://win.on.cc/football/　

曼聯近期愈戰愈勇，喺英超更加殺上「一哥」位置，法國中場保羅普巴更有「翻生」表現，踢出加盟曼聯以來最高水平嘅表現。日前1比0贏般尼一仗，保羅普巴同尼曼查馬迪組成超高效率嘅中場拍擋，兩人全場合共錄得20次重奪控球權，而曼聯雙中場今季聯賽場均只係得9次，可見保羅普巴除咗入波之外，對球隊仲有好大貢獻。英國《曼徹斯特晚報》消息，曼聯對利物浦一仗，保羅普巴有望繼續到尼馬查馬迪合組中場，為般奴費南迪斯提供最穩陣支援。

保羅普巴經理人拉奧拿喺月初發風，話呢位法國國腳想今個月走人，結果保羅普巴唔單止冇走，而且仲愈踢愈好，喺嚟緊對利物浦嘅「雙紅會」前，保羅普巴更發表奪冠宣言：「我哋成功上到第1名，依家就要確保一直留喺呢個位置，我哋完全專注喺聯賽上面，我哋會繼續呢個走勢，向冠軍進發！」