皇馬西超盃輸波出局 夢幻決賽無緣上演

20210115
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
周五(15日)凌晨西超盃4強大戰,皇家馬德里面對換帥冇耐嘅畢爾包,喺上半場失魂連失2球,最終下半場發力為時已晚,以1比2輸畀畢爾包無緣決賽。畢爾包將會喺星期一(18日)凌晨同巴塞隆拿爭奪冠軍寶座。
皇家馬德里早段控制戰局,夏薩特製造過幾次似樣攻勢,但入唔到波之餘後防又失魂,18分鐘被魯爾加西亞單刀偷襲得手;踢到38分鐘,皇馬右閘盧卡斯華斯基斯禁區內魯莽犯規輸12碼,魯爾加西亞操刀個人梅開二度。換邊後皇馬瘋狂搶攻,賓施馬73分鐘追番1球,但畢爾包最終堅守2比1勝果到完場,成功躋身決賽。皇馬法國中堅華拉尼疑似腦震盪,喺半場退下火線,輸波兼折將。
今場係畢爾包主帥馬些連奴上任後第2場比賽,首場領軍2比3僅輸巴塞隆拿,第2仗即淘汰皇馬殺入決賽。今場係馬些連奴歷來帶領第4支球隊擊敗皇家馬德里,之後佢教維爾瓦、維拉利爾同華倫西亞都曾經打沉「銀河艦隊」,佢賽後興奮表示:「每次贏皇馬都覺得好滿足,球員今場付出100%,我對球隊表現非常滿意。」