【官宣】盧卡祖域回歸法蘭克福

《串績王》新登場，最強博彩盤路過關神器：http://win.on.cc/football/　

德甲球會法蘭克福官方宣布，球隊成功向皇家馬德里借用前鋒盧卡祖域至季尾，呢位塞爾維亞前鋒喺2019年以6,200萬鎊天價轉會費，由法蘭克福過檔皇家馬德里，可惜佢去到西甲之後完全踢唔出水準，今季更加被教練施丹打入冷宮，依家以借用身份回歸法蘭克福，皇馬真係蝕到入肉。

依家只係23歲嘅盧卡祖域，18/19球季喺法蘭克福大放異彩，全季上陣48場攻入27球，成功獲得皇家馬德里垂青，不過上季西甲只踢17場聯賽入2球，今季4次上陣更加未入過波。盧卡祖域重返法蘭克福後會著起9號波衫，球會總監波碧表示：「盧卡祖域喺皇馬面對困難，依家最重要係幫佢重拾狀態，皇馬知道我哋一定會好好照顧佢，而法蘭克福亦有多一個世界級前鋒可以用。」