全場0次過人　夏薩特逼走挪威神童

《英超刨績王》加強版，最強數據一網打盡：http://win.on.cc/football/　

皇家馬德里喺西超盃輸畀畢爾包出局，擔起進攻大旗嘅比利時中場夏薩特表現繼續令人失望，喺英超以「舞龍式」扭波過人見稱嘅佢，今場錄得0次成功扭波，結果踢66分鐘就畀教練施丹換走。夏薩特傷愈之後，最近連續2場正選上陣，但皇馬先0比0悶和奧沙辛拿，今場又輸波出局，夏薩特自然成為眾矢之的。

施丹賽後繼續力撐呢位比利時中場：「佢需要恢復信心，可能係1個入波或者1場出色比賽，佢好努力，大家要畀多少少耐性，依家呢個唔係真正嘅夏薩特，但我哋會繼續支持佢，大家都知道佢係一個偉大球員。」皇馬堅持信任夏薩特，就令另一位進攻中場馬田奧迪加特地位更危，呢位挪威22歲神童，自12月中傷愈之後，只係踢過5分鐘比賽，雖然施丹表示1月份冇打算放走佢，但據報馬田奧迪加特見落場機會渺茫，將會向皇馬提出轉會要求。