魚與熊掌！亨特拉爾證實史浩克04斟介

《英超刨績王》加強版，最強數據一網打盡：http://win.on.cc/football/　

荷蘭37歲前鋒亨特拉爾老而彌堅，雖然佢喺阿積士已經退居後備，不過周五(15日)凌晨荷甲仍然做救世主，佢喺完場前1分鐘先入場下，竟然個人梅開二度協助阿積士贏3比1。亨特拉爾賽後更證實獲德甲史浩克04斟介，認真犀利！

阿積士喺荷蘭作客川迪，有新加盟前鋒施巴斯坦賀拿首度正選上陣，結果處子戰只係7分鐘就先開紀錄，不過去到84分鐘被川迪追平。阿積士89分鐘換入亨特拉爾博殺，佢喺90分鐘接應施巴斯坦賀拿助攻入波，補時2分鐘再入1球鎖定勝局。

最近有傳史浩克04想斟亨特拉爾回巢救亡，呢位老將賽後向《ESPN》證實：「報道已經出咗，我同阿積士溝通緊，但呢個係好艱難嘅選擇，我喺阿積士已經踢咗6年半，喺史浩克04亦踢過7年，佢哋係我最愛嘅兩間球會。史浩克04依家更需要我，但喺阿積士有機會捧盃，真係好難揀，我會瞓多一晚之後再決定。」