力壓迪布尼高圖爾斯　盧卡古膺比利時最佳

足球博彩神器，每日重心提供盡在《彩報》：http://win.on.cc/football/　

意甲周日（17日）深夜上演重量級大戰，國際米蘭會喺主場迎戰祖雲達斯，國米前鋒盧卡古賽前收到好消息，呢名27歲射手成功力壓奇雲迪布尼及泰拔高圖爾斯，獲選為2020年比利時最佳海外球員。

呢個選舉係由比利時國內報章《最新消息報》主辦，最初目的係想表揚過去一年喺比甲聯賽表現出色嘅球員，2000年開始主辦單位增設「最佳海外球員」獎項；盧卡古今屆以363分成績，力壓330分嘅奇雲迪布尼首次當選，第3至5位分別係泰拔高圖爾斯、梅頓斯及泰利文斯，過去3屆得主夏薩特僅排第12位。

喺國米主帥手上接過獎座嘅盧卡古於社交網站發表個人感受：「我好感謝上帝畀機會我攞到呢個獎項，我亦要多謝國際米蘭及比利時國家隊嘅隊友，每次都係佢哋令我可以贏到獎項，同時我亦要多謝兩軍教練團，係你哋令我變得更強。」