意甲首都打吡　拉素炒羅馬平紀錄

澳職開鑼，即上《澳職刨績王》：https://win.on.cc/football/league/aleague/index.html　

周六(16日)凌晨意甲「首都打吡」，拉素喺主場以3比0大炒羅馬，錄得聯賽3連勝，呢個比數亦追平拉素喺意甲「首都打吡」史上最大勝仗，拉素曾經喺06年11月同19年3月，都係以3比0波膽擊敗羅馬。

開季表現低沉嘅拉素，近期連贏2場後狀態提升，今場14分鐘就由射手恩莫比尼把握羅馬後防犯錯先開紀錄，西班牙球星路爾斯阿拔圖之後再喺23分鐘同67分鐘建功，呢位中場亦係自1998年嘅文仙尼後，第1個為拉素喺主場入羅馬2球嘅球員，拉素最終輕鬆大勝3比0。

拉素教練施蒙尼恩沙基賽後表示：「我哋今場踢得好好，決心、進取、快速，其實我之前一日由球員眼入面，已經睇到同以前唔同嘅目光，我知道佢哋已經搵到正確心態。」