熱刺爆內訌　有人不滿摩連奴唔用巴利

《英超刨績王》加強版，最強數據一網打盡：http://win.on.cc/football/　

熱刺近6場英超只有1勝，依家傳出爆發內訌，英國傳媒指有部份主力認為加里夫巴利喺操練時，表現出色，應該獲得更多上陣機會，但領隊摩連奴卻故步自封，將呢位威爾斯國腳投閒置散，令球隊成績一直冇改善。

加里夫巴利今季由皇馬外借去熱刺之後，只曾喺英超上陣4次，其中得1次係正選，4場加埋踢咗161分鐘，包括對白禮頓一場役，射入1球。

加里夫巴利喺歐霸盃對寧斯，英聯盃對史篤城，都取得入球，所以有部份隊友認為巴利應該值得有更多上陣時間，但摩連奴始終唔肯重用佢，加上熱刺近期成績欠佳，上場英超被弱隊富咸逼和，令部份主力進一步質疑「寸王」嘅用人方針。

據悉，摩連奴認為加里夫巴利嘅狀態唔穩定，唔敢重用佢，加上熱刺方面亦唔打算續借或買斷加里夫巴利，今季結束之後，佢就會重返皇馬，自然難以獲得「寸王」信任。