「新林柏特」建奇功 車路士絕殺富咸

20210117
東網電視
更多新聞短片
(Getty Images)
澳職開鑼,即上《澳職刨績王》:https://win.on.cc/football/league/aleague/index.html 
周日(17日)凌晨英超「倫敦打吡」,狀態欠佳嘅車路士靠22歲新星美臣蒙特射入全場唯一入球,作客以1比0擊敗富咸,結束連續3場英超不勝頹勢。不過,車路士領隊林柏特仲未可以開心住,因為車仔嚟緊周中惡鬥李斯特城,先至係大考驗。
車仔中場主力尼高路簡迪今場停賽,美臣蒙特肩負重任,成為球隊中場發電機,呢位英格蘭國腳亦交足功課,妙傳畀基奧特起腳,但被富咸門將艾路拿撲出。
踢到25分鐘,美臣蒙特又創造威脅,佢禁區內勁射,可惜中楣彈出。臨完場上半場,富咸左閘安東尼羅賓遜飛剷艾斯派古達,被球證出示紅牌趕出場,成為賽事轉捩點。
車路士踢多1人優勢之下,終於喺78分鐘,由美臣蒙特射入,勉強贏1比0。美臣蒙特亦繼英足盃對摩甘比一役入波之後,連續2場比賽建功,呢位新星係車仔青訓產品,上季英超有7球進帳,今季亦入咗2球,屬於全能中場,甚有林柏特昔日影子。賽後「林伯」都大讚美臣蒙特比佢當年22歲時更出色,車路士復興之路,美臣蒙特將擔當重要角色。
反觀,車仔今季高價收購嘅外援迪姆華拿,表現繼續令人失望,呢位德國前鋒今場又食白果,包括比賽末段單刀射失,近10場英超都冇波入,佢過去獲得嘅14次入波機會,浪費咗13次,唯一成功射入,係英足盃對英乙球隊摩甘比,表現絕對唔合格。難怪唔少球迷認為車仔與其高價買球星,不如重用球會青訓球員好過。