普巴揚言為求上陣　踢後衞都願意

《英超刨績王》加強版，最強數據一網打盡：http://win.on.cc/football/　

周一(18日)凌晨英超將上演「雙紅會」利物浦主場對曼聯，全球矚目，兩軍球員都渴望上陣踢呢場大戰，曼聯中場保羅普巴似乎擔心畀領隊蘇斯克查擺後備席，事先張揚話，最憎做後備，只要有得上陣，任何位置都願意踢。

保羅普巴話：「我討厭坐後備席，並非因為其他隊友唔配上陣，而係我屬於1位爭勝決心好強嘅人，我只係想比賽，幫助球隊，當我坐後備席，唔可以出場嘅時候，就乜都做唔到，所以唔想做後備。我想做好每件事，無論踢中路、左路、右路、前鋒、後衞都冇所謂，只要可以上陣幫助球隊就冇問題。」保羅普巴講到咁，蘇斯克查今場都好難唔畀佢擔正。