大鑊！巴塞遇剋星球證　整定要見紅？

《串績王》新登場，最強博彩盤路過關神器：http://win.on.cc/football/　

周一(18日)凌晨將上演西超盃決賽，巴塞隆拿對畢爾包，今場將由「巴塞剋星」球證捷西斯文沙奴主吹，呢位34歲嘅黑衣判官以往執法巴塞隆拿嘅比賽，曾經出現唔少爭議，包括多次將巴塞球員趕出場，莫非巴塞今場又會見紅？

早於2016/17球季西班牙盃4強，捷西斯文沙奴已經同巴塞隆拿結怨，當時捷西斯文沙奴向巴塞中場沙治羅拔圖、前鋒蘇亞雷斯出示紅牌，搞到巴塞9人應戰，好彩都可以晉級決賽。

該季西甲巴塞對馬拉加，捷西斯文沙奴亦將尼馬趕出場，同季巴塞對西維爾，美斯被對手直接踩腳，捷西斯文沙奴卻視若無睹。

2018/19球季西甲巴塞隆拿對基羅納，捷西斯文沙奴指巴塞中堅基文迪朗格勒向對手批肘，向佢出示紅牌，搞到巴塞和波失分。最諷刺係賽後基羅納球員都話基文迪朗格勒冇批肘，難怪比賽之後，美斯拒絕同捷西斯文沙奴握手。

巴塞隆拿今場對畢爾包，就睇下捷西斯文沙奴又會有乜「壯舉」。