文尼單刀即吹完場　軒達臣怒插球證

《英超刨績王》加強版，最強數據一網打盡：http://win.on.cc/football/　

英超「雙紅會」話題多多，利物浦喺上半場佔盡優勢，唔單止有66%控球率，射門次數亦有9比1嘅壓倒性優勢，不過利物浦最大嘅入波機會，竟然就畀球證泰亞尼提早吹完場雞而扼殺！

上半場補時階段，利物浦一次中場組織交長波畀沙迪奧文尼突破防線，將成單刀之勢，點知泰亞尼未等攻勢完成就吹雞完場，最離譜係明明補時1分鐘，泰亞尼鳴笛嗰陣只不過係54秒，消失嘅6秒足夠畀沙迪奧文尼推進並作出射門。

利物浦隊長佐敦軒達臣賽後亦批評球證：「你可以想像到，我哋對呢件事好唔開心，奇怪、非常奇怪！如果球證唔吹雞，沙迪奧文尼就會係單刀。我唔知點解會咁，但半場嗰陣球員都好激氣。」