逃出車仔雪櫃　湯姆利將外借AC米蘭

《英超刨績王》加強版，最強數據一網打盡：http://win.on.cc/football/　

車路士今季簽入老將堤亞高施華後，上季成功上位嘅英格蘭新星湯姆利上陣機會大減，今季只係後備上陣踢過44分鐘英超賽事，突然由英格蘭新晉國腳變成可有可無口嘅大後備。為扭轉呢個「兩敗俱傷」情況，《天空體育》報道車路士已經同AC米蘭達成協議，湯姆利將以借用身份加盟「紅黑兵團」半季。

據報車路士今次放走湯姆利，已經做好永久失去呢位英格蘭中堅嘅打算，今次借用費為100萬歐元，而AC米蘭喺借用期完結後，有權畀多2,900萬歐元轉會費將湯姆利正式買斷。消息指紐卡素同一間西甲球會都想簽湯姆利，不過呢位23歲中堅最終選擇AC米蘭。

車路士嘅中堅改革仍然進行中，據報魯迪格同安達斯基斯坦臣都被視為可以賣走嘅球員，近日有消息指車路士同熱刺，正爭奪踢緊中超嘅南韓中堅金玟哉，據報呢位24歲高大中堅轉會費為1,500萬鎊。