美斯為「出拳」向隊友耍冧　停賽2場

《串績王》新登場，最強博彩盤路過關神器：http://win.on.cc/football/　

美斯周一凌晨喺西超盃決賽，接近完場向畢爾包嘅維拿利巴送上「兜鎚鍋面」，攞到佢嘅巴塞生涯嘅首張紅牌，成為球壇話題，面臨停賽12場重罰嘅美斯返到更衣室，即向隊友耍冧。賽會周二(19日)宣判，美斯只係被罰停賽2場。

西班牙傳媒報道指美斯喺比賽後返到更衣室，即向隊友道歉，並且話自己一時衝動，消息指美斯喺更衣室自己講番呢張紅牌，同隊友耍冧，解釋自己當時情緒失控，而且頻頻受到對手嘅犯規而心生不滿，又加上自己表現差，兼睇住球隊就快輸波，所以一時火遮眼。

有西媒透露，巴塞會為美斯呢張紅牌提出上訴，有傳媒指呢面紅牌都攞得冤枉，認為美斯被對手衝撞後想推倒對手，並非出手打維拿利巴嘅頭部。

西班牙賽會周二有判決，美斯被罰停賽2場，包括周五凌晨西班牙盃作客哥尼拿，以及周日晚西甲作客艾爾切。