欺善怕惡？般奴費南迪斯「大戰隱形」

澳職開鑼，即上《澳職刨績王》：https://win.on.cc/football/league/aleague/index.html　

曼聯依家喺英超排榜首，般奴費南迪斯絕對係關鍵人物，呢位葡萄牙中場技術超卓，入波同助攻數據更加勁到嚇親人，不過英國《太陽報》最近就有個統計指出，般奴費南迪斯大部份數據都係對住實力較弱球隊「刷」出嚟，面對Big 6球隊威力大減。

上場對住利物浦，般奴費南迪斯表現相對沉靜，亦係佢今季第7場冇入波或助攻嘅聯賽，球迷亦開始發現一個令人擔心嘅走勢，就係般奴費南迪斯面對勁旅表現往往跌Watt。數據顯示般奴費南迪斯登陸英超後，8次面對Big 6球隊只入2球，平均每328分鐘先入1球，相反佢對住其他球隊，平均每119分鐘就入1球。

就算加埋助攻數字，亦有類似走勢出現，面對Big 6球隊，般奴費南迪斯平均每164分鐘有1次助攻/入波，但對住Big 6以外球隊就每70分鐘交出1次助攻/入波，似乎曼聯嚟緊再踢大戰，要搵人分擔般奴費南迪斯嘅責任先得啦！