因為肚屙　奧巴美揚放棄帽子戲法

《英超刨績王》加強版，最強數據一網打盡：http://win.on.cc/football/　

阿仙奴前鋒奧巴美揚尋晚對紐卡素順利起孖，而且睇佢全場表現，再整多粒完成帽子戲法都大有可能，但當佢攻入第2球後突然被換離場，傳媒追查之下發現，原來當時佢因為肚屙離場，放棄戴帽。

英國《每日星報》報道，奧巴美揚自從早前足總盃對紐卡素取得士哥，狀態開始回升，今場英超再對紐卡素，該位加蓬射手回復水準，先在50分鐘在左路推進直搗黃龍勁射破網，77分鐘再接應薛迪索拉斯底線傳中，門前輕鬆破網，當時阿仙奴贏到3比0。

以奧巴美揚今仗表現，餘下10幾分鐘比賽時間大有機會整多粒完成帽子戲法，但起孖後2分鐘佢就被調離場，傳媒就此向主帥阿迪達查詢，答案竟然係咁，阿迪達笑住話：「佢唔走唔得，因為佢突然攪肚痛，需要去廁所，所以我只能換人。」

阿迪達仲大讚奧巴美揚回復水準，佢話：「其實佢上半場已經有2、3個機會，開賽15分鐘佢面對空門，但可能角度太窄，而佢亦跑得太快，結果射中柱。」