學寸王泊大巴　朗尼教波首嘗勝利

《英超刨績王》加強版，最強數據一網打盡：http://win.on.cc/football/　

曼聯名宿朗尼坐正打比郡領隊之位後，終於首嘗教波勝利滋味，佢喺周三(20日)凌晨英冠，率領打比郡主場以1比0擊敗前列強隊般尼茅夫，取得護級「救命3分」。

朗尼早前宣布掛靴，成為打比郡主帥，但佢上場首場領軍，卻不敵另一支護級球隊洛達咸，以為今場面對爭升班強隊般尼茅夫，又會再失利。

朗尼亦自知球隊實力較弱，於是「寸王上身」，採取「泊大巴」穩守突擊戰術，主場出擊竟然只有38%控球率，但勝在反擊效率高，12次射門有6次中目標，反觀般尼茅夫9次射門只有2次中目標。

踢到32分鐘，打比郡把握1次角球攻勢，由中場基斯甸比歷門前混戰中射入全場唯一入球。賽後朗尼話：「今場係1場了不起嘅勝利，球隊上下近期都承受好大壓力，球員今場做到我嘅要求，擁有爭勝決心同態度，只要保持落去，我哋會成為一支難以被擊敗嘅球隊。」打比郡升上尾4，但只比尾3洛達咸多2分，而且踢多2場，護級形勢仍然險峻。