曼聯歡笑背後　桑馬達或黯然離隊

足球博彩神器，每日重心提供盡在《彩報》：http://win.on.cc/football/　

曼聯今季愈戰愈勇，排英超榜首，但全隊歡笑背後，隊內有1位球員黯然神傷，佢就係桑馬達，領隊蘇斯克查嘅藍圖之中，已經冇呢位32歲西班牙老將嘅位置，盛傳桑馬達好可能今個月就會離隊。

桑馬達今季英超只上陣6次，其中4次正選，佢將於今夏約滿，曼聯有權啟動續約1年條款，但至今仍然未有行動，可見已經無意留用桑馬達。

蘇斯克查表面上話將桑馬達放喺後備名單，係非常困難嘅決定，但同時話未同佢傾去留問題，顯示桑馬達走人只係時間問題。

桑馬達近年主要踢右中場，由於曼聯早前簽入阿特蘭大18歲翼鋒迪亞路查奧爾，邊路球員已經有人滿之患，令桑馬達更加冇立足空間，加上佢周薪達16萬鎊，曼聯亦唔想高薪養住1位後備，離隊成為佢唯一選擇。有傳西甲球隊華倫西亞想簽番桑馬達，踢下半季護級戰。