潮流興去土超　丹尼路斯將投特拉布宗

足球博彩神器，每日重心提供盡在《彩報》：http://win.on.cc/football/　

繼阿仙奴中場奧斯爾轉投土耳其勁旅費倫巴治、車路士中場真禾特外借卡斯帕薩，另1支倫敦球隊熱刺嘅後衞丹尼路斯，亦準備去土超搵食，據悉特拉布宗計劃簽入呢位30歲英格蘭國腳。

丹尼路斯上年1月被熱刺外借去紐卡素，當時佢批評領隊摩連奴冇畀佢足夠表現機會。丹尼路斯得罪「寸王」，梗係冇運行啦，佢今季返回熱刺，立即被打入冷宮，冇份入選英超及歐霸盃球員名單，甚至連球衣號碼都冇，只能夠踢U23賽事。摩連奴根本當丹尼路斯唔存在，加上佢今夏就約滿，所以唔介意提早今個月放走佢。

據悉，特拉布宗已經接觸丹尼路斯，佢可能買斷自己份合約，今個月以自由身加盟特拉布宗。丹尼路斯2007年由列斯聯加盟熱刺，屬於現時隊內效力最長時間嘅球員，可惜依家已淪為冗員。