利物浦都踢燒味波　阿諾特「斬」出0%紀錄

足球博彩神器，每日重心提供盡在《彩報》：http://win.on.cc/football/　

近年鋒力令人聞風喪膽嘅利物浦，近期突然唔識進攻，近5場聯賽不勝兼有4場交白卷，「紅軍」嘅入波板斧更愈玩愈窄，近幾場瘋狂進行「燒味戰術」，右閘阿歷山大阿諾特今場對般尼更加「斬」出英超史上最羞家紀錄，真係慘不忍睹。

據網站《Goal》統計數字，利物浦自聖誕節之後，5場聯賽平均每場有35次傳中，比起早前阿仙奴7場不勝嘅場均26.5次傳中更多。其實靠傳中進攻並唔係問題，但傳中質素就非常關鍵，阿歷山大阿諾特喺對般尼一仗，個人「獨取」21次傳中，可惜當中只有1次角球成功畀到隊友，18次生波傳中成功率係0%，成為英超史上第1個單場至少12次傳中而冇成功過嘅球員。