曼城最後13分鐘入3球　驚險反勝乙組仔

《英超刨績王》加強版，最強數據一網打盡：http://win.on.cc/football/　

周日(24日)凌晨英足盃第4圈幾乎爆大冷，英超豪門曼城作客乙組球隊車頓咸，竟然先落後，直至最後13分鐘，先至連入3球驚險反勝3比1，晉級16強，將會遇上英冠球隊史雲斯。

曼城領隊哥迪奧拿今場輪換10人，得番菲爾科頓繼續踢正選，包括派出費倫托利斯、湯馬斯杜利、艾利加西亞等「00後」新星擔任正選，並由美國門將薩克史提芬把關。

曼城仍然佔有較多攻勢，其中費蘭甸奴、加比爾捷西斯都有射門中柱，久攻不下之際，更於59分鐘被車頓咸偷襲得手，由中場艾菲美爾近門射入，亦係曼城近509分鐘比賽首次失波。

不過，「藍月亮」始終整體實力較高，強攻之下，踢到81分鐘由菲爾科頓射入扳平，3分鐘之後加比爾捷西斯近門射入反超前，去到補時4分鐘再由費倫托利斯射成3比1，曼城總算有驚無險晉級。