非洲神鋒戴帽！一戰超越美斯蘇亞雷斯

《串績王》新登場，最強博彩盤路過關神器：http://win.on.cc/football/　

周六(23日)深夜西甲，西維爾主場以3比0擊敗卡迪斯，前鋒安尼斯利表現光芒四射，包辦3個入球。呢位23歲摩洛哥國腳今季西甲已經轟入12球，並以1球優勢，一舉超越美斯、蘇亞雷斯，升上射手榜第1位。

今場比賽變成安尼斯利個人表現時間，35分鐘蘇索射門中柱彈出，佢立即補射入網，4分鐘之後，安尼斯利接應罰球頂入。到咗下半場，安尼斯利把握對手解圍失誤，再次用頭槌頂入成3比0，完成帽子戲法。

值得一提，踏入2021年之後，安尼斯利已經第2次「戴帽」，上次係對皇家蘇斯達，佢又係包辦3個入球，協助西維爾贏3比2，腳風極之順。

身高1米89嘅安尼斯利出身於馬拉加青年軍，2016年已經出戰西甲，佢上年1月以2,500萬歐元轉會費，由雷加利斯轉投西維爾，上季西甲為西維爾上陣18場只入4球，今季聯賽上陣19場已入12球，表現判若兩人。