孫興民又攞獎　榮膺亞洲最佳外流球員

《英超刨績王》加強版，最強數據一網打盡：http://win.on.cc/football/　

熱刺前鋒孫興民喺英超大放異彩，成為亞洲球員之光，亞洲足協官網日前公布2020年最佳外流球員，孫興民喺毫無懸念之下順利得獎，亦係佢近6年第4次贏取呢個殊榮。孫興民喺2020年為熱刺攻入22球，表現光芒四射，佢之前已經奪得19/20球季亞洲足球先生、2020南韓足球先生以及國際足協普斯卡斯獎(全年最佳入球)，可以話係大豐收。

今次亞洲最佳外流球員選舉，孫興民以25.03分高分當選，第2位係效力波圖嘅伊朗前鋒達利美，溫哥華白帽嘅伊拉克球星阿里卡特謙排第3位。效力華倫西亞嘅南韓新星李康仁排第7位，利物浦嘅日本前鋒南野拓實就排第9位。