杜曹同意執教車路士 最快周四領軍鬥狼隊

20210126
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
英超豪門車路士周一(25日)怒炒領隊林柏特後,已經火速傾掂替補人選,據多間英國同德國媒體報道,早前被巴黎聖日耳門炒魷嘅德國教頭杜曹,已經同意車路士開出嘅合約,預計最快今日(26日)可以正式落實,周四(28日)凌晨主場對狼隊嘅聯賽有望首度領軍。
自由身嘅杜曹一直係車路士新帥目標,林柏特被炒後斟介行動非常順利,《天空體育》消息指杜曹同意簽18個月短約(外加續約條款),但法國《RMC》就話杜曹簽約4年半。杜曹目前正喺德國等候新冠肺炎檢測報告,只要證實無礙就可以即刻飛去英國簽約。
延伸閱讀:【車仔「德甲幫」成大贏家 杜曹係計時炸彈?】
車路士周二(26日)操練改由青年軍教練祖艾華士負責主理,佢明顯只係客串性質,車仔需要杜曹盡快加盟接掌帥印,消息指車路士正嘗試解決杜曹到達英國後隔離嘅問題,球會有信心可以以「精英運動」特例為杜曹爭取豁免,令佢可以周四凌晨主場對狼隊嘅英超賽事領軍。
林柏特被炒後亦發出聲明回應:「好榮幸能夠教執車路士,一間我人生中奉獻最多嘅球會。感激球迷過去18個月對我嘅支持,由上任開始我就知道面前會有幾大挑戰,我為球隊嘅成就,以及一眾被提拔上一隊嘅年輕球員感到光榮。好失望未有更多時間帶領球隊進步,祝車路士有更好將來。」