大Sam認斟賓迪基　西布朗護級一箭雙Deal

足球博彩神器，每日重心提供盡在《彩報》：http://win.on.cc/football/　

西布朗喺英超護級形勢水深火熱，「護級專家」艾拿戴斯上任後未見太大起色，球隊為作最後努力，準備喺1月轉會窗引入2名攻擊球員，其中水晶宮前鋒賓迪基就係「大Sam」愛將，艾拿戴斯亦直認希望同呢位舊部重逢。

艾拿戴斯以往執教水晶宮，賓迪基就係球隊主力前鋒，呢位比利時球星同水晶宮合約只係剩番半年，西布朗就希望將佢招攬，艾拿戴斯表示：「我唔清楚賓迪基係咪可以轉會，呢方面我交畀總監同轉會部門處理。如果賓迪基真係可以轉會，我當然想再同佢合作，大家都知道我哋想簽多2個攻擊球員。」

除賓迪基係目標之外，喺2016年至2018年效力李斯特城嘅尼日利亞翼鋒阿密特穆沙，亦即將到西布朗試腳，有望正式簽約。呢位28歲球星早前離開沙特阿拉伯嘅艾拿沙後，已經回水復自由身，西布朗簽佢機會極大。