阿仙奴復仇贏聖人　奧迪加特落實入廠

《英超刨績王》加強版，最強數據一網打盡：http://win.on.cc/football/　

阿仙奴3日前喺英足盃被修咸頓淘汰後，周三(27日)凌晨英超成功報回一箭之仇，作客以3比1反勝修咸頓，近6場聯賽5勝1和強勢反彈，稍後亦宣布正式從皇馬借入挪威中場馬田奧迪加特，為下半季賽事提供更強火力。

阿仙奴今場有奧巴美揚因私事缺陣，開波1分鐘即有拿卡錫迪單刀失機，3分鐘更頂唔住修咸頓角球攻勢，被史超活岩士唐怒射破網。阿仙奴企穩陣腳後開始反擊，尼高拉斯比比5分鐘後禁區內冷靜射成1比1，39分鐘拿卡錫迪妙傳布卡約沙卡殺入禁區射入反超前入球，阿仙奴72分鐘由布卡約沙卡投桃報李，傳中予拿卡錫迪近門撞入，「兵工廠」最終順利贏3比1。

近6場聯賽贏5場後，阿仙奴已擺脫低潮期，領隊阿迪達賽後更透露，由皇家馬德里借用馬田奧迪加特已經「七七八八」，而之後阿仙奴亦宣布，正式借用奧迪加特半季，並揀咗11號波衫，呢位挪威神童創造力強，連同早前向白禮頓借用門將馬菲賴恩，阿仙奴下半季嘅兵源將進一步加強。