2米巨人暴力頭槌！史特加兩蛋贈緬恩斯

澳職開鑼，即上《澳職刨績王》：https://win.on.cc/football/league/aleague/index.html　

周六(30日)凌晨德甲獨腳戲，史特加主場以2比0擊敗緬恩斯，身高達2米嘅前鋒沙沙卡拉積錫發揮空中優勢，勁頂入網，非常屈機，令人諗番起以前效力多蒙特嘅捷克巨人真高拿。

賽前史特加已經3場不勝，今場對住護級份子緬恩斯，上半場亦佔唔到優勢，直至55分鐘，史特加先至打開紀錄，波拿蘇沙左路傳中，沙沙卡拉積錫憑高大身軀頂入，亦係呢位奧地利國腳今季第6個聯賽入球。

同樣係奧地利國腳，緬恩斯前鋒安尼斯禾就冇咁好彩，佢接應罰球勁頂，但中楣唔入。史特加避過一劫之後，果然有後福，憑華曼基杜卡個人表演，殺入禁區射成2比0，結束2連敗頹勢。緬恩斯早前曾經爆冷擊敗爭標勁旅RB萊比錫，但原來只係曇花一現。