電腦壞咗！阿積士神鋒離奇緣盡歐霸盃

《英超刨績王》加強版，最強數據一網打盡：http://win.on.cc/football/　

荷甲勁旅阿積士喺冬季轉會窗，用2,000萬英鎊向韋斯咸收購前鋒施巴斯坦賀拿，呢位26歲射手轉會後頭6場比賽就有2入球同4助攻，絕對係鋒線主力，不過阿積士周四(4日)向歐洲足協提交歐霸盃大軍名單，施巴斯坦賀拿竟然榜上無名！阿積士亦證實施巴斯坦賀拿未註冊，係出現「行政失誤」，相當肉酸。

阿積士教練坦哈格證實：「真係超級失望，球員當然失望，球會都係一樣，施巴斯坦賀拿本來喺名單之內，但最後出現行政上失誤，部電腦出現咗問題。首先，我同奧華馬斯(總監)一定要負上責任，人總會犯錯，但呢個係頂級嘅體育組織，呢啲錯誤唔應該發生。施巴斯坦賀拿好失望，但佢知道球會並唔係故意咁做。」

阿積士原本打算向歐洲足協及荷蘭足總商討，希望可以畀佢哋更改名單，不過歐洲足協周五（5日）證實冇彎轉，施巴斯坦賀拿肯定唔可以喺今屆歐霸盃淘汰賽上陣。阿積士歐霸盃32強將會同法甲勁旅里爾交鋒。