李斯特城開最高薪合約綁實「發電機」

足球博彩神器，每日重心提供盡在《彩報》：http://win.on.cc/football/　

李斯特城今季名列前茅，比利時中場泰利文斯嘅精彩演出係重要原因，呢部「發電機」今季22場聯賽全部上陣，當中有21場係正選身份踢足全場，而且有5個入波同2次助攻，可以話係球隊無名英雄。據英國《每日郵報》報道，李斯特城已提前同泰利文斯傾續約，而且開出全隊最高薪嘅10萬鎊周薪，相信成事機會唔細。

李斯特城領隊羅渣士證實：「我哋想盡快同佢續約，球隊初初簽佢嗰陣(2019年1月)，佢喺摩納哥冇乜上陣機會，但呢兩季佢證明自己嘅實力，而且進步好多。以佢咁後生嘅年紀(23歲)，踢出咁成熟同穩定嘅表現，真係好神奇。」李斯特城季初同占士麥迪臣續約都係10萬鎊周薪，而泰利文斯目前合約到2023年夏天先完結。