根度簡飛機致敬超級碗　艾達臣做新劊子手

《英超刨績王》加強版，最強數據一網打盡：http://win.on.cc/football/　

曼城喺英超作客大破利物浦，中場根度簡做英雄前幾乎成為罪人，呢位德國國腳近期「士哥」大爆發，今仗梅開二度係佢近9場聯賽第8球，不過佢上半場主射12碼竟然「飛機」，連佢自己賽後都忍唔住自嘲，話係向超級碗賽事致敬。

根度簡賽後喺twitter留言：「有人同我講今日係超級碗，一個射門值3分......」據Opta數據顯示，英超對上6個未能命中龍門嘅12碼，有4個係由曼城球員包辦，更有趣嘅係當中3次都係對利物浦，包括2018年嘅馬列斯、上年嘅奇雲迪布尼同今場根度簡。

曼城領隊哥迪奧拿賽後表示，考慮畀門將艾達臣摩拉斯做下個劊子手：「根度簡宴客，對利物浦射失12碼好似成為指定環節，呢個係一個問題，重要時刻唔可以咁浪費。我依家諗嘅係艾達臣摩拉斯，佢可能會係下一個12碼嘅劊子手。」