悲哀！摩連奴第3次遭5球羞辱

《英超刨績王》加強版，最強數據一網打盡：http://win.on.cc/football/　

熱刺喺英足盃16強加時4比5不敵愛華頓，亦係熱刺領隊摩連奴教波生涯第3次帶隊失5球輸波，第1次係2010年11月，皇馬作客0比5慘敗畀巴塞隆拿，當年巴塞中堅碧基做出5指手勢慶祝，成為經典一幕。

第2次係2015年1月，摩連奴執教車路士，作客3比5不敵熱刺，最諷刺係呢位葡萄牙名帥成為熱刺領隊之後，依家又遭遇失5球輸波。

賽後摩連奴話熱刺入到4球都輸波，只能怪自己：「入咗4球就應該贏，以我哋一貫嘅踢法，原本應該輕鬆取勝，但卻出現太多進攻同防守失誤，球員已經盡晒力，對部份球員來講，踢得咁好已經唔容易，但犯下1、2、3次失誤，就足以落後1比3，我會抱積極態度，今場比賽係好精彩。」

熱刺下場英超將作客勁旅曼城，摩連奴真係執番好條防線，否則可能到時失得仲多波。