連續2場零封　阿列沙巴拿加解凍踢出身價

《英超刨績王》加強版，最強數據一網打盡：http://win.on.cc/football/　

車路士主場2比0擊敗紐卡素，除有前鋒迪姆華拿打破入球荒，門將阿列沙巴拿加亦大打爭氣波，呢名全球最高身價門將自去年10月後，從未試過喺英超正選上陣，今場被委以重任，結果冇令新帥杜曹失望，全場作出4次撲救，保住後防不失，成為車仔另一位贏波功臣。

前任車仔領隊林柏特季初高價收購塞內加爾門神艾度亞文迪，阿列沙巴拿加基本上已被放入雪櫃，只有間中喺盃賽上陣把關；上場聯賽車仔作客雖以2比1擊敗錫菲聯，不過卻出現咗新帥杜曹「上車」後首個失波，而且明顯係中堅魯迪格及門將艾度亞文迪犯錯，結果繼上場英足盃對班士1比0後，阿列沙巴拿加取得個人近4個月來首次英超正選落場，賽後佢獲評得7.6分高分，排全隊第3，僅次中場高華錫及隊長艾斯派古達。

領隊杜曹亦對阿列沙巴拿加演出予以肯定：「佢能夠連續2場保持冇失波，我好開心，咁可以幫佢搵番比賽節奏同信心。」杜曹曾經講過會畀機會所有球員，睇吓阿列沙巴拿加能否把握機會搶番正選位置。