熱刺為卡尼標價1.5億鎊　曼聯出手嗎？

《英超刨績王》加強版，最強數據一網打盡：http://win.on.cc/football/　

熱刺雙箭頭哈利卡尼同孫興民，近日都成為歐洲豪門目標，有評論認為哈利卡尼更一直被熱刺耽誤，如果佢加盟歐洲各大球會，成就會更高。英國傳媒報道，雖然熱刺將27歲嘅哈利卡尼列作非賣品，但假如出售，標價將會係1.5億鎊(約16.2億港元)，為世界第3高身價。

英國《每日郵報》報道，熱刺主席利維只要收到1.5億鎊報價，就會考慮出售哈利卡尼，報道中暗示熱刺在疫情下承受一定財政壓力，如果高價賣走哈利卡尼，對球會長遠發展有幫助。

熱刺與哈利卡尼合約至2024年，現時周薪大約為20萬鎊，收入遠遠低於歐洲頂級豪門前鋒所得。有評論認為，哈利卡尼應該加盟一直有爭標能力嘅球隊，留喺熱刺，職業生涯只會繼續食白果，甚至每年嘅歐聯席位都未必能夠確定。

曼聯一直有收購熱刺首席前鋒嘅傳統，以往舒寧咸及貝碧托夫都來自熱刺，如果簽入哈利卡尼，係歷史嘅延續。