雲格爆料　亨利韋拉爭做般尼茅夫領隊

《英超刨績王》加強版，最強數據一網打盡：http://win.on.cc/football/　

英冠球會般尼茅夫目前帥位懸空，雖然看守領隊活基治領軍4場3勝，但球會仍然希望向外物色新主帥，傳聞目前執教美職球隊蒙特利爾衝擊嘅亨利係大熱門，不過據佢恩師雲格爆料，亨利昔日好拍擋韋拉亦係般尼茅夫新帥候選人，兩大法國名將會爭奪帥位。

雲格日前接受訪問，被問到般尼茅夫搵亨利一事，呢位71歲傳奇表示：「我有聽過韋拉係般尼茅夫目標，至於亨利佢教緊蒙特利爾衝擊，所以我冇諗過佢會走人。不過般尼茅夫係一間好球會，對任何人嚟講都係一個好好嘅挑戰，尤其對想喺英超發展嘅年輕領隊，會係一個好好嘅舞台。」韋拉上年底被尼斯炒魷後，至今仍然未有班落。