狼隊幸運入波「雙殺」列斯聯

《英超刨績王》加強版，最強數據一網打盡：http://win.on.cc/football/　

周六(20日)凌晨英超大戰，狼隊憑住一個幸運「烏龍波」，主場以1比0小勝列斯聯，自上年10月後首度喺英超錄得連勝，同時亦成為6年來，首支喺聯賽「雙殺」比爾沙執教球隊嘅隊伍。

狼隊同列斯聯今場都非常積極，製造咗唔少具威脅埋門，不過雙方門將都表現突出，狼隊門將魯爾柏迪斯奧全場有7次精彩撲救，係狼隊近11年來單場作出最多撲救嘅門將；列斯聯20歲門將梅斯利亞同樣屢救險球，只可惜運氣麻麻。踢到64分鐘，狼隊翼鋒艾達馬查奧爾遠射中楣彈出，點知個波就省中梅斯利亞反彈入網，令梅斯利亞慘成英超史上最年輕擺烏龍門將。狼隊亦以呢個幸運入波贏1比0。

狼隊對上一次連勝已經要數到上年10月，當時第2場勝仗又係列斯聯。有統計指列斯聯領隊比爾沙，自14/15法甲球季之後，從未試過係單季聯賽被同一隊「雙殺」，狼隊今次就成為比爾沙嘅剋星。