車仔留力留出禍　聖人終止6連敗

《英超刨績王》加強版，最強數據一網打盡：http://win.on.cc/football/　

周六晚（20日）英超頭場，車路士因有歐聯後顧留力留出禍，作客只能逼和修咸頓1比1，聯賽連盃賽5連勝斷纜，亦令「聖人」終止聯賽6連敗頹勢。

由於車仔嚟緊周中要應付歐聯16強首回合鬥馬體會，主帥杜曹今仗亦對陣容作出調整，正選收起赫臣奧杜爾、佐真奴費路等主力，改用列斯占士同尼高路簡迪，而箭頭譚美阿巴謙及時傷愈擔正。不過車仔空有控球優勢，進攻唔太入肉，反而之前6場聯賽輸晒嘅修咸頓，第一次中龍埋門即刻有收鑊，33分鐘列特文直線劏穿車仔防線，南野拓實假動作呃過艾斯派古達快射破網，唔單止係呢位利物浦借將3次為「聖人」披甲嘅第2個士哥，亦係車仔自杜曹接手後，首次非烏龍波、而係被對手攻破大門。

易邊後車仔立即換入赫臣奧杜爾，冇耐隊友美臣蒙特殺入禁區遭丹尼艾格斯掃跌，球證直指12碼，美臣蒙特親身操刀扳平。其後修咸頓中堅維斯達加特頭槌頂中楣角，幾乎收死車仔，末段杜曹再換入佐真奴費路同薛耶治，可惜冇乜起色，最終各一言和。