曼聯今夏清洗門將　迪基亞軒仔二揀一

《英超刨績王》加強版，最強數據一網打盡：http://win.on.cc/football/　

英國《太陽報》爆料指，曼聯將於今夏賣走1位門將，迪基亞、甸恩軒達臣，只有1人可以留隊。

據悉，甸恩軒達臣私底下一直不滿未能獲得正選，並曾經搵過領隊蘇斯克查「密斟」，希望了解自己喺隊內嘅前途。蘇B向佢透露，甸恩軒達臣同迪基亞下季只能留1人，至於邊個可以留隊，仍然係未知之數，可能係蘇斯克查想「激勵」甸恩軒達臣，令佢知道自己仲有機會擊敗迪基亞。

蘇斯克查目前比較信任迪基亞，即使呢位西班牙國腳經常出現犯錯，仍然有正選位置。不過，曼聯下半季要全力衝冠，如果迪基亞又頻頻「派膠」，相信蘇B亦唔會對佢再有幾多耐性，話唔定最後被踢走嘅人，可能係迪基亞。

另外，英國《太陽報》指曼聯送走迪基亞、甸恩軒達臣其中1人之後，會簽入1位後備門將，最緊要係新人選願意擔任後備，唔好重演甸恩軒達臣嘅情況。