空中霸王！C朗頭槌起孖　重登射手榜第1位

足球博彩神器，每日重心提供盡在《彩報》：http://win.on.cc/football/　

周二(23日)凌晨意甲獨腳戲，力求衛冕嘅祖雲達斯主場以3比0大勝克羅托內，同榜首國際米蘭差距拉近至8分兼且踢少1場，保持爭標希望。葡萄牙球星C朗拿度今場化身「空中霸王」，頭槌梅開二度後今季意甲累積18球，反壓盧卡古(17球)重登射手榜第1位。

面對榜尾嘅克羅托內，祖雲達斯全場圍攻對手，艾朗藍斯早段曾頂中楣，不過祖記高空攻勢就明顯奏效，38分鐘C朗接應阿歷士辛度長傳頭槌建攻，完半場前艾朗藍斯底線傳中，C朗再一次「飛將軍」式出現頭槌鑿入。下半場C朗有數次機會未能把握，66分鐘再由韋斯頓麥堅尼入波「埋齋」，祖雲達斯大勝3球完場。

C朗今季有18個入波重登射手榜榜首，今場亦係佢今季第7次喺聯賽梅開二度，成為5大聯賽入面單場「2+」入波最多球員。另外，克羅托內係C朗職業生涯第78次攻破嘅5大聯賽球會，自21世紀以來，只有伊巴謙莫域攻破過更多球會大門(79隊)，C朗仍有機會打破呢項神級紀錄。