3次射門入2球　水晶宮絕殺白禮頓

《英超刨績王》加強版，最強數據一網打盡：http://win.on.cc/football/　

水晶宮話畀球迷聽乜嘢叫「效率足球」！周二(23日)凌晨英超護級大戰，水晶宮全場捱打情況下，憑住賓迪基喺補時絕殺，作客以2比1擊敗白禮頓。水晶宮今場得25%控球率，但全場2次中龍射門全部入晒，贏出護級重要一戰。

白禮頓今場圍攻有韋費特沙夏缺陣嘅水晶宮，不過客隊第1次射門就入波，28分鐘桑馬迪達接應佐敦阿休傳中，乖巧用後腳射入。白禮頓狂攻下喺55分鐘由祖爾韋特文追平，可惜去到95分鐘，賓迪基窩利抽入實現絕殺，白禮頓全場25次射門但1分都拎唔到。

水晶宮今場3次射門入2球，同樣劇本喺首循環已經出現，當時水晶宮主場只係得1次射門就入波，作客嘅白禮頓20次射門亦係入1球，結果兩隊打成1比1平手。水晶宮目前25場拎到32分，係球隊英超史上同時段最佳紀錄，護級前景一片光明。