日職開鑼　20隊降4打崩頭

日職名宿中澤佑二專業分析：https://bit.ly/3pFUjXJ　

新一季日職於周五（26日）正式開鑼，揭幕戰上演神奈川打吡，上季冠軍川崎前鋒主場鬥前季盟主橫濱水手；由於上季日職取消降班制，日乙則如常有2隊升班，所以今季破天荒有20隊角逐，賽事亦由以往34輪增至38輪，加上賽會決定唔理東京奧運能否如期舉行，7月中至8月中都冇安排比賽，可以預見今季賽程會更加緊密，周中快車相應增加，對球隊後備兵源係一大考驗。為咗讓下季回復18隊比賽，今季日職將有4隊降班，榜末形勢定必比以往爭持得更加激烈。

今季揭幕戰安排喺周五晚舉行，代表停辦一季嘅「金J」（金曜日，即星期五）賽事將會復辦。當初設立「金J」其中一個目的，係希望利用「小周末」打夜波，吸引球迷參加酒會等聯誼活動，加強互動及刺激商業銷情，今次重設「金J」，最大目的都係想振興經濟，幫助受疫情影響嘅球會及各行各業。