阿特蘭大隊長入籍意國　30歲圓國腳夢

足球博彩神器，每日重心提供盡在《彩報》：http://win.on.cc/football/　

意甲神奇球隊阿特蘭大，近年急速冒升為意甲以至歐洲一大新勢力，雖然陣中冇乜巨星級猛將，但一眾實而不華嘅球員仍然受到一致好評。效力球隊超過5年嘅隊長拉菲爾杜萊，日前獲國際足協批准入籍意大利，如無意外將獲國家隊領隊文仙尼徵召，有望喺30歲實現踢國家隊美夢。

30歲中堅拉菲爾杜萊係喺巴西出世，踢過巴西U20國家隊，不過一直都寂寂無名，到阿特蘭大近年起飛，大家先至留意到呢位中堅嘅實力，據報意大利國家隊主帥文仙尼對佢非常賞識，早前透過意大利嘅親戚拎到意大利公民資格，意大利足總亦向國際足協提交轉籍申請，由於拉菲爾杜萊喺意大利已生活超過5年，加上未代表過巴西國家隊踢正式賽事，所以申請順利獲得批准。

意大利會喺3月份展開世界盃外圍賽，預計拉菲爾杜萊將會首度獲得徵召，如果佢可以一直保持出色表現，甚至有機會出戰今年夏天嘅歐洲國家盃決賽周。