基奧特超級倒掛 車路士力克馬體會

2021年02月24日 08:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
周三(24日)凌晨歐聯16強首回合大戰,車路士憑「銀河唯一」基奧特奉獻超級倒掛金勾入波,喺羅馬尼亞以1比0擊敗馬德里體育會,次回合返主場級形勢大好。數據顯示,車路士過去喺歐洲賽淘汰賽首回合作客贏波,晉級率係100%,前景一片光明。
馬德里體育會今仗掛名「主場」,但表現就被車路士壓過,上半場只係得1次射門,相反車路士就不斷用高速發動攻勢,只係未能攻破奧比歷嘅十指關。去到68分鐘,車路士馬高斯阿朗素左路傳中,馬里奧靴莫素解圍失誤,處於越位位置嘅基奧特即施展倒掛金勾射入,球證同VAR檢視後判入球有效。馬體會落後下加強進攻,但全場6次射門冇1球命中目標,最終車路士小勝1比0。
基奧特可以話係車路士福星,佢今場以34歲146日之齡,成為球會史上歐聯淘汰賽入波最老球員,亦係佢近16次為車路士喺歐洲賽正選上陣入嘅第15球。車路士領隊杜曹賽後大讚基奧特:「佢可以為呢個入波感到光榮。如果你每日睇基奧特練波,你唔會對呢個入波覺得驚奇,佢嘅體型、體能同心理都非常之弗,同一個20歲球員並冇分別。」
今場係車路士歷來第14次喺歐洲賽淘汰賽首回合作客贏波,數據顯示佢哋對上13次都喺次回合順利晉級。車路士自杜曹上任以來,8場比賽有6勝2和不敗佳績,而且8場波只係失過2球,演出非常對辦。