拜仁大炒拉素現霸氣 羅拔仔成歐聯「3狂」

20210224
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
志切衛冕歐聯嘅拜仁慕尼黑,周三(24日)凌晨16強首回合賽事大發神威,作客以4比1大破意甲勁旅拉素,一隻腳已經踩入8強。波蘭前鋒羅拔利雲度夫斯基今場入波,正式超越西班牙傳奇前鋒魯爾,獨佔歐聯史上射手榜第3位,僅次C朗拿度同美斯成為歐聯入波「3狂」。
拜仁慕尼黑雖然傷兵滿營,不過今場作客拉素就展示出超班實力,開波只係9分鐘,羅拔利雲度夫斯基就截到拉素回傳,扭過門將後輕鬆射入。英格蘭歲新星穆斯亞拿喺24分鐘射成2比0,佢以17歲363日之齡,成為德國球會喺歐聯淘汰賽史上最年輕入球者,完半場前利萊辛尼「執雞」拉開到3比0。換邊後2分鐘,拉素再有法蘭斯高阿沙比擺烏龍,雖然2分鐘後祖亞昆哥利亞為主隊破蛋,但拜仁慕尼黑仍以4比1大勝而回。
連埋今場入波,「羅拔仔」喺歐聯入波累積至72球,超越71球嘅魯爾成為史上第3射手,只係輸畀兩大球王C朗拿度(134球)同美斯(119球)。