曼聯借將比甲爆發　布魯日竟然冇註冊歐霸？

《英超刨績王》加強版，最強數據一網打盡：http://win.on.cc/football/　

曼聯喺冬季轉會窗外借連格，睇住佢喺韋斯咸大爆發，其實「紅魔鬼」爆發嘅外借兵唔止佢，荷蘭小將鍾達希1月被借去布魯日後，表現同樣出色，月初處子戰喺比利時盃即刻入波，周二(23日)首次喺比甲正選上陣，亦交出助攻兼博到12碼，協助布魯日主場3比0大炒奧特海維利。

布魯日周五(26日)凌晨會喺歐霸盃32強次回合，主場大戰基輔戴拿模，兩隊首回合踢成1比1，大勇嘅鍾達希本應係布魯日嘅爭勝武器，可惜呢支比甲班霸竟然冇幫佢註冊！布魯日喺冬季轉會窗簽咗4個新兵，但歐洲足協規例限制季中只可以更換3個球員，結果鍾達希就成為被犧牲一個。

布魯日3個新註同球員，包括巴斯杜斯、丹斯威爾同拿比達亞，不過丹斯威爾早前確診新冠肺炎，首回合已經開始缺陣，拿比達亞更加上陣機會極少，加盟至今只踢過1場正選，唔知球會有冇後悔冇幫鍾達希註冊呢？