賓菲加「英超復仇者聯盟」要爆廠

《串績王》新登場，最強博彩盤路過關神器：http://win.on.cc/football/　

賓菲加將於周五(26日)凌晨歐霸盃32強次回合，出戰阿仙奴，呢支葡超勁旅陣中有3位前英超兵，包括2位中堅奧達文迪、維頓漢，以及中場泰拉拔。其中維頓漢同泰拉拔都效力過倫敦球會多年，呢3位「英超復仇者聯盟」今場生死戰勢必要做一齣好戲，淘汰兵工廠。

奧達文迪、維頓漢上年夏天分別由曼城、熱刺轉投賓菲加，當時兩位33歲老將同樣屬於棄將，黯然離開英超，但佢哋加盟賓菲加之後獲得重用，維頓漢各項賽事上陣28場，並有1球進帳。至於奧達文迪踢21場亦入咗1球，兩人喺首回合防守出色，令阿仙奴進攻舉步維艱。

特別係維頓漢之前效力嘅熱刺，同阿仙奴屬於北倫敦死敵，呢份觀念亦深植喺佢腦海之中，遇上兵工廠自然額外落力。

值得一提，賓菲加中場泰拉拔亦曾於2006至09年效力熱刺3季，並踢過另外2支倫敦球隊富咸、昆士柏流浪，熟晒阿仙奴底細，相信會成為今場爆「廠」主力。