羅渣士魔咒　李斯特城意外出局

足球博彩神器，每日重心提供盡在《彩報》：http://win.on.cc/football/　

歐霸盃16強出爐，熱刺、阿仙奴同曼聯3支英超勁旅悉數晉級，不過李斯特城就慘情出局，佢哋喺主場出擊意外吞捷克勁旅布拉格斯拉維亞2蛋，兩回合計以0比2輸波出局。李斯特城領隊羅渣士，連續第5次喺歐霸盃32強出局。

李斯特城首回合作客打和0比0，今仗返主場被一致睇好，不過全場受制於客隊嚴密布防，射手占美華迪表現相當淡靜，李斯特城攻唔入之餘，更喺下半場連失2球出局。李斯特城出局令「羅渣士魔咒」再次應驗，呢位領隊歷來5次帶隊出戰歐霸盃淘汰賽，結果全部都係32強出局，包括利物浦(12/13球季、14/15球季)、些路迪(17/18球季、18/19球季)同李斯特城(20/21球季)。

羅渣士賽後亦灰爆認輸：「我哋輸咗畀支更出色嘅球隊，我要為自己所選嘅球隊負責，兩回合李斯特城都創造唔到足夠機會，而且失咗2個令人失望嘅波，今場係更加好嗰支球隊出線。」