曼城1億鎊斟多蒙特孖寶　搵埋老竇幫口

《英超刨績王》加強版，最強數據一網打盡：http://win.on.cc/football/　

曼城今夏除咗斟介美斯，球隊亦打算換血，有消息稱，「藍月亮」睇中多蒙特攻擊孖寶，挪威新人王艾寧夏蘭特同基奧雲尼雷拿，希望出1億鎊買晒2個。

英國《90min》報道，曼城視艾寧夏蘭特為中鋒阿古路接班人，由於阿古路今夏約滿，會方打算畀佢自由身離隊，再簽入艾寧夏蘭特出任球隊中鋒位置，認為以佢嘅入球能力，未來足以在英超及歐聯發揮作用。

不過要簽入艾寧夏蘭特絕對唔容易，此子近年冒起，被視為基利安麥巴比之外另一位未來球王，歐洲各大豪門都吼到佢實，其中車路士及皇馬都會爭相出價。

曼城另一目標，就係夏蘭特隊友、美國翼鋒基奧雲尼雷拿，佢喺多蒙特青訓出身，上陣48場交出5球8助攻，曼城睇好佢發展潛力，希望買番嚟好好栽培。

除咗出價1億鎊，曼城仲會打親情牌，因為艾寧夏蘭特同基奧雲尼雷拿兩人嘅父親，都曾効力曼城，到時搵佢哋老竇幫口，成事機會都高啲。