朗奴高文記者會再流鼻血　健康惹人擔憂

足球博彩神器，每日重心提供盡在《彩報》：http://win.on.cc/football/　

巴塞隆拿教練朗奴高文周六(27日)出席西甲對西維爾賽前記招，答問期間呢位荷蘭教頭突然流鼻血，佢最初諗住將鼻血吸返入去，但由於血量唔少，朗奴高文拎出嘅紙巾亦被染成紅色，巴塞隆拿新聞官見到佢不斷流血，隨即宣布記者會提前結束。

今次唔係朗奴高文第1次出現呢個情況，1月底對畢爾包嘅賽前記者會，朗奴高文亦喺席上流鼻血，幾個星期內2次出現呢個情況，唔少球迷都非常擔心，好在巴塞隆拿事後表明朗奴高文情況良好，流鼻血只係因為佢服用針對心臟問題嘅薄血藥。

現年57歲嘅朗奴高文上年5月曾因心臟問題，緊急入院接受手術，治療後健康情況良好，並且喺上年夏天接手執教巴塞隆拿。