港超聯 踢番!愉園激鬥東方龍獅

20210227
東網電視
更多新聞短片
周六(27日)晚上於旺角大球場上演的愉園對東方龍獅「中銀人壽香港超級聯賽」對決,因賽前愉園上訴得直,將如期舉行!「快活谷」有約一周時間作調整,陣中球員「叉足電」,必定希望重返賽場再證明自己,東方龍獅亦希望延續連勝走勢,雙方必有一番激鬥。(周六晚上7時開賽)
愉園上仗2球淨勝冠忠南區,主教練鮑家耀滿意球隊表現。對於朱偉鈞下半場與袁世傑炮製的精彩入球,「鮑sir」認為屬於訓練的成果:「練習嗰陣我成日要求球員做多啲第一時間傳送,或者一、兩腳波就要畀,因為咁樣先焗住佢哋諗多嘢。」他期望這個入球及勝利除了令一班小將開心外,還可以藉此提起他們的信心。另外前鋒羅拔奧度上仗未有被編入大軍名單,「鮑sir」指這名尼日利亞球員在賽前拉傷大脾,今仗或會趕及傷瘉復出。
至於右閘林衍廷上仗禁區內被指犯規,連累球隊輸掉12碼,「Fat gor」坦言經驗不足,形容自己表現僅僅合格:「落腳嘅決定做得唔好,嗰陣其實都好驚,因為如果就嚟完半場畀人追和都幾麻煩。」
東方龍獅周中於「菁英盃」4強旗開得勝,以1比0擊敗強敵傑志,不過比賽中有巴西攻擊手艾華頓紅牌被逐,今場要停賽,球隊總監兼主教練李志堅亦坦言主將領紅是美中不足。復賽早期就要面對密集賽程,「堅Sir」希望球隊不要出現傷病情況的同時,當然想見到一班球員,尤其一眾新兵可以盡快提升比賽狀態,其中過去兩仗都有機會披甲的杜度及費蘭度,表現繼續值得期待。
場外因素令今場比賽賽前充滿不確定性,最終直至比賽當日才確定如期進行,但主力門將葉鴻輝認為球隊在備戰上,沒有因此出現太大分別:「由始至終,我哋都當會踢呢場比賽,準備上都冇咩唔同。」他指出因為聯賽剩下8隊,留給東方龍獅的失分空間幾乎全無,今場面對愉園,球員必須要非常集中。