車路士神奇法寶　微波爐「叮」波砵？

足球博彩神器，每日重心提供盡在《彩報》：http://win.on.cc/football/　

依家踢波除咗靠球員技術同戰術之外，為爭取勝利真係無所不用其極，據英國《太陽報》爆料，車路士自上季開始發明咗一個奇招，就係比賽前將每個球員對波砵拎去微波爐「叮」一「叮」，據佢哋所講波砵加熱後，球員會著得更加舒適，有助提升表現喎！

據《太陽報》報道，車路士呢部微波爐係安裝喺訓練場，而且喺本土作客嗰陣亦會帶埋上隊巴一齊出征，被視為車路士賽前備戰嘅重要一環，有球會人士透露：「依家多數波砵設計都係比較緊，係Fit Size多過用鞋帶固定，當天氣凍嗰陣會著得唔舒服，尤其係啱啱著落去嗰陣，所以球會將波砵放入微波爐加熱1至2分鐘，令到鞋身變軟。呢個做法並唔係因為班球員嬌生慣養，而係要令佢哋好舒適咁盡快踢出最高水平。」

呢個咁新潮嘅方法並唔係由杜曹引入，消息話車路士自上季開始已經用緊呢個方法，不過用微波爐「叮」非食物始終有一定危險性，車路士有咁多專家先至做得到，一般球迷千其唔好亂學呀！